ԱՀԿ-ն նշել է ճարպակալման գլխավոր պատճառը. 1in.am

Մարդկության մարմնի միջին քաշը 20 տարում աճել է 8%-ով՝ հիմնականում սննդակարգի բարձր կալորիականության պատճառով: Mail.ru-ի հաղորդմամբ՝ այս մասին փաստում են մասշտաբային հետազոտության արդյունքները, որոնք հրապարակվել են հուլիսին Առողջապահության համաշխարհային կազմակերպության (ԱՀԿ) բյուլետենում:

Մարդն ավելորդ քաշ է հավաքում, եթե ուտում է ավելին, քան նրա օրգանիզմն օրական ծախսում է: Ավելորդ քաշը, առավել ևս՝ ճարպակալումը, հանգեցնում են առողջական շատ խնդիրների և կրճատում կյանքը: Ճարպակալման մասին խոսում են, երբ մարդու քաշն առնվազն 20%-ով գերազանցում է նորման, իրանի ծավալը գերազանցում է 100 սմ-ը տղամարդկանց դեպքում և 90 սմ-ը՝ կանանց, իսկ իրանի և ազդրերի ծավալների հարաբերակցությունը տղամարդկանց դեպքում ավելի է 1-ից, կանանց դեպքում՝ 0,45-ից:

Գիտնականների խումբը՝ Ստեֆանի Վանդեվեյվերեի գլխավորությամբ, հավաքել և վերլուծել է աշխարհի 69 երկրի բնակիչների սննդակարգի կալորիականության, նաև այդ երկրների բնակիչների մարմնի զանգվածի միջին վիճակագրական ցուցանիշների փոփոխությունների մասին ավելի քան 30 տարվա տվյալներ: Հետազոտությանը մասնակցել է բնակչության եկամտի բարձր մակարդակով 24 երկիր, 27 երկիր՝ միջին և 18՝ ցածր մակարդակով:

Ճարպակալման ինտենսիվ տարածման պատճառը, հետազոտողների կարծիքով, գերվերամշակված սննդամթերքներն են՝ որպես կալորիաների հիմնական աղբյուր: Դրանք են՝ արագ սնունդը, կիսաֆաբրիկատները, բլիթներն ու շոկոլադե սալիկները, չիփսերը, բքաբլիթները: Միայն տանը պատրաստված սնունդը կարող է լիովին համապատասխանել օրգանիզմի պահանջմունքներին և չգերազանցել կալորիաների ցուցանիշները:

ԱՀԿ կանխատեսմամբ՝ աշխարհում մինչև 2030թ. սպասվում է ճարպակալման վիճակագրության աննախադեպ աճ, երբ Եվրոպայի տղամարդկանց 73%-ը և կանանց 63%-ը կտառապեն ճարպակալմամբ: Անհրաժեշտ է անհապաղ միջոցներ ձեռնարկել և նվազեցնել ճարպակալման հիմնական մեղավորների՝ տրանսճարպերի, հագեցած ճարպերի, ավելորդ շաքարի օգտագործումը:

Հարցեր, պատասխաններ, մեկնաբանություններ